'A chitarra 'e Regginella (di Biagio Merlino)

Chitarra : 'mpulverata staje murenne

fredde 'e gnessata dint''o sgabbuzzino

si , se n'è gghiuta ...e tu nun stai sunanne,

quanta ricorde t 'hè purtata 'nzino.

Stive cu mme , cantanne Regginella

accumpagnanno ll'aria d''a canzone.

Tutte assettate ncopp''a na grarella.

Ognuno eva na ponta da curona.

Nu pucurillo 'e sciuscio pe na voce

na ntruppecata ca tremmava 'a corda

'a casarella mia vesteva 'e doce

Bella Mbriana sonna sti ricorde.

Si nun ce staje capisco e me sto zitto

tiene nu sole tuoje ca t'accumpagna

e chistu pietto mio se fa cchiù stritto

e si me guardo 'o mare ancora chiagno.

Biagio Merlino

diritti riservati